हैदारावादमा ‘लिभ इन रिलेसनसिपमा’ बसिरहेकी नेपाली महिलाको हत्या

डुनामिस न्युज,काठमाडौं । ‘लिभ इन रिलेसनसिप’मा बसेकी महिलाको हत्या गरेको आरोपमा बागलुङ भर भई भारतको तेलंगाना राज्य स्थित हैदराबादमा बस्दै आएका विजय तोप्पा पक्राउमा परेका छन् ।

आफूसँगै बस्ने ३३ बर्षीय तारा बोहरालाई हत्या गरेर शव झोलामा राखी फ्याँकेको आरोपमा ३० बर्षीय तोप्पालाई भारतीय प्रहरीले पक्राउ गरेको हो ।

इन्डिया टुडे अखबारमा प्रकाशित समाचार अनुसार जुन ४ मा हैदराबाद नजिकैको एक आवासीय क्षेत्र बचुपल्लीमा झोलामा राखिएको ताराको शव फेला परेपछि घटना सार्वजनिक भएको थियो ।

स्थानीय रेस्टुरेन्टमा सेफको काम गर्ने तोप्पालाई घटनालगत्तै प्रहरीले पक्राउ गरेको थियो ।

बागलुङ नै भर भएकी तारा र बिजय लिभ इन रिलेसनसिपमा बस्दै आएका थिए ।

विजय र तारा फेसबुकमार्फत सम्बन्धमा जोडिएका प्रहरी अनुसन्धानका क्रममा पत्ता लागेको छ ।

विवाहित र दुई सन्तानकी आमा बनिसकेकी तारा अप्रिल १५ मा हैदराबाद पुगेर बोरम्पेटमा विजयसँग भाडामा बसेकी थिइन् ।
प्रहरीका अनुसार, मे २३ मा ताराको गर्भावस्थाका विषयमा उनीहरू दुईजनाबीच झगडा भएको थियो ।

त्यही क्रममा विजयले नाइलन ब्यागको धागोले ताराको घाँटी कसेर हत्या गरेर शव झोलामा राखेर फालेको प्रहरीले जनाएको छ ।

आरोपितलाई पक्राउ गर्न पाँच विशेष टोली गठन गरिएको थियो । सीसीटीभी फुटेज र प्राविधिक प्रमाणका आधारमा प्रहरीले विजय मेड्चल जिल्लाबाटगिरफ्तार गरेको थियो । प्रहरी बयानमा उनले आफ्नो अपराध स्वीकार गरिसकेका छन् ।