१८ चैत, काठमाडौं । साढे पाँच महिनापछि पार्टी जीवनमा फर्किँदा रास्वपा सभापति रवि लामिछाने आफ्नो वाक्पटुतासहित वनस्थली कार्यालयमा उपस्थित थिए ।
उनले आफू र आफ्नो दल वर्तमान प्रणालीको पक्षमा रहेको जिकिर गरे, तर स्थापित पुराना दलहरूको कित्तामा भने नउभिने ठोकुवा गरे । सहकारी संस्थाहरूमा बचतकर्ताहरूको रकम अपचलन अभियोगमा लामो हिरासत तथा अदालती बयानबाजीका बेला लामिछाने पार्टी जिम्मेवारीमुक्त थिए । उनको सांसद पद अझै निलम्बित छ । अनि सहकारी ठगीसम्बन्धी अभियोगमा धरौटी बुझाएर हिरासतमुक्त बने पनि उनले अदालती मुद्दामा सफाइ पाएका छैनन् ।
